kindwees was soms ‘n scary plek
die mites van my land het my soet gehou
want antjie somers sou my kom gryp
en brolloks en bittergal
het kinders kom haal
en die lammervanger was op my spoor
so stokkiesdraai was ongehoort

“sussa, ek is bang
hou my vas die monsters gaan my vang”

en in die aand was daar iets in die kas
dit het gegrom en gestaan agter ‘n ou jas
en as die weerlig hard slaan in die nag
het ek hom hoor ritsel en saggies lag

“sussa, ek is bang
hou my vas die monsters gaan my vang”

“sussa, wat my stories vertel
jy was soms scary maar jy was my pel
en elke keer as ek bang in die nag
jou naam roep het jy die monsters
met jou besem weggejaag…”

mites van my bloed
oorvertel van kind tot kind
kinders van vandag
sal dalk nooit dit ondervind
want Hollywood het ons stories vermoor
en kinders het gegroei
en stories is ophou vertel
want nou is die monsters op t.v. nuus
en die kinders in tronke en agter tralies

maar dalk het iemand ‘n Sussa
wat hulle vashou… en die monsters wegjaag

(c) 2015 allen simpson
opgedra aan Sussa

Advertisements